ජනතාවගේ බලය යලි යලිත් දුෂිත දේශපාලකයිනට මතක් කර දිය යුතුව ඇත.
පොහොට්ටුවේ චන්දයෙන් ජනාධිපති වූ අපේ වචනයෙන් කියතොත්, පිං ජනාධිපතිවූ රනිල් දැවැන්ත මෙහෙයුමක් ආරම්භ කොට ඇතිබව අප සැමටම ඉතා පැහැදිලිවම පෙනෙන්නට තිබේ.
ත්‍රස්තවාදය වැළක්වීමේ පනත යටතේ අන්තරේ ශිෂ්‍ය නායකයින් රඳවා තබාගැනීම පිළිබඳව ජාත්‍යන්තර ක්ෂමා ආයතනය, මුලික මිනිස් අයිතිවාසිකම් සුරැකීමේ සංවිධානය, මිනිස් අයිතිවාසිකම් ආරක්ෂණ සංවිධානය, එක්සත් ජාතීන්ගේ සංවිධානය සහ ඇමරිකානු තානාපති කාර්යාංශය ට්විටර් පණිවිඩ වලට එහා ගිය බලපෑම් හෝ බලකිරීම් කිසිවක් ශ්‍රී ලංකා රජයට කිරීමට පසුබට වන බවක් පැහැදිලිවම දකින්නට තිබේ.
එයට හේතුව කුමක්දැයි සුළුවෙන් හෝ වටහා දීම අපගේ අද දවසේ කාර්යභාරය යයි අප විශ්වාස කරමු.
දින කිහිපයක් ආපස්සට ගොස් මෙය තේරුම් කරදීම ඉතා වැදගත් වෙනබව මෙහිලා සඳහන් කල යුතුය.
මුලින්ම පසුගිය කාලයේ රාජපක්ෂලා විසින් අරගල කරුවන්ට පහර දීමත්, රනිල් ගේ පෞද්ගලික භට හමුදාව, ගාලුමුවදොර අරගල කරුවන්ට දැඩි ලෙස පහරදීමත් සමගම ජාත්‍යන්තර ප්‍රජාව විසින් ශ්‍රී ලංකා රජය දැඩි විවේචනයට ලක් කර තිබුණි. ජාත්‍යන්තර මුල්‍ය අරමුදල පවා රනිල්ගේ රජයට සෑහෙන මට්ටමකට බලපෑම් කිරීමට සමර්ථ වී තිබුණි.
ඊට දින කිහිපයකට පසු කොහේදෝ සිට චීන යුධ නවුකාවක් ශ්‍රී ලංකාවට සැපත් විය. එය ජාත්‍යන්තරයට මුඛ වාඩම් බැඳීමට සමත්වෙන සේ රනිල් වික්‍රමසිංහ ගැසූ ඉතාමත් සාර්ථක ගැටයක් බව කිසිවෙකුටවත් සිතාගත නොහැකි විය.
භූගෝලීය වශයෙන් ඉතාම වටිනා සන්ධිස්තානයක පිහිටා ඇති ශ්‍රී ලංකාව, ඇමරිකාවට, චීනයට සහ ඉන්දියාවට ඉතා වටිනා දිවයිනකි. චීන නවුකාව ශ්‍රී ලංකාවට ගෙන්වා ගැනීමෙන් ලංකාවට චීනය කෙතරම් සමීප දැයි රනිල් ජාත්‍යන්තරයට පෙන්වා දුන්නේය. එහෙයින් ඇමරිකාවේ මුල්‍ය ආධාරයෙන් රැකෙන සංවිධාන වලට මුඛවාඩම් බැඳීම ඇමරිකාව ලවාම කරවා ගැනීමට රනිල් සමත් විය.
චීනය පසෙකට තල්ලු කරමින් හැකිතරම් ඉක්මනින් ශ්‍රී ලංකා රජය සමග ඉතා හොඳ මිත්‍රත්වයක් ඇතිකර ගැනීමට නම් ඇමරිකාවට ශ්‍රී ලාංකික පොදුජනතාව ගේ අයිතිවාසිකම්, රජයෙන් කෙරෙනු ලබන මර්ධන සහ වංචා දුෂණ සියල්ල නොදැක්කා සේ සිටීමට සිදුවී තිබේ. දැන් දැන් එය සිදුවෙමින් පවතින බව අප සියල්ලෝම දනිමු.
ජාත්‍යන්තර මුල්‍ය අරමුදලේ නියෝජිතයින් ළඟදීම ශ්‍රී ලංකාවට පැමිණෙනු ඇත.
ශ්‍රී ලාංකිකයින්ගේ එක පුද්ගල ණය ප්‍රමාණය දස ලක්ෂයේ සිට ඉහළට මිස පහලට නොයනු ඇත.
වංචාකාරී දුෂිත දේශපාලුවන් පන්නා ගැනීමට මුලිකත්වය ගත් පුද්ගලයින් සිරභාරයට ගනු නොඅනුමානය.
රජය විවේචනය කරනු ලබන සංස්ථා සහ සංවිධාන තහනම් කරනු ඇත. එසේනම් පිඩනයට පත් පොදු ජනතාව කෙසේ මේ සටන ජයගත යුතුද යන්නද මෙහිදී සිහිපත් කල යුතුව ඇත.
අරගල භූමියක් නොමැති අරගල කරුවන් ලක්ෂ ගණනින් දිවයින පුරා විසීරී ඇත. මුදලිගේ ඇතුළු ශිෂ්‍යයින් බේරාගැනීමට කඩිනම් නොවුවහොත් අපට ඉතිරිව ඇති අවසාන තුරුම්පුවද රනිල්ගේ දෙකේ කොලයට යට වෙනවා ඇත. එසේනම් කල යුත්තේ කුමක්ද?
අප කෙසේ හෝ අපගේ බලය, ජනතාවගේ බලය යලි යලිත් දුෂිත දේශපාලකයිනට මතක් කර දිය යුතුව ඇත. ජුනි 9 වැනිවූ දිනයන් ගණන සංඛ්‍යාවෙන් වැඩිකළ යුතුය.
නිතර නිතර ජනබලය ඔවුනගේ බලයට වඩා දස දහස් ගුණයකින් බලවත් බව දුෂිත දේශපාලකයින්ට පෙන්වා දිය යුතුය. මේ සඳහා අප වහ වහා වීදි බැසිය යුතුය. හදිසිනිතියේ සිට අසාධාරණ, තාඩන පීඩන සහ මර්ධන නවත්වන්නැයි බල කරමින් එකාමෙන් පෙළ ගැසිය යුතුය. ඒ හැර අන් කිසිම විසඳුමක් සාමකාමී ජනතාව වූ අපට ඉතිරිවී නොමැත.
Add comment