අපගේ මුදලින් නඩත්තු වෙන දාමරිකයින් එලවා දමන්නේ කෙසේද?

නීතියෙන් දිය හැකි උපරිම දඬුවම මරණීය දණ්ඩනයයි. එයත් මේවන විට බොහෝ රටවල නීති පද්ධතියෙන් ඉවත් කර අවසානය. වරද කරුවෙකු ලෙස ඔප්පු වෙන තෙක් දඬුවම් කිරීමද වරදකි. ආරක්ෂක හමුදාවට හෝ පොලිසියට කෙනෙකුට දඬුවම් දිය නොහැක. කිසි ලෙසකවත් පහරක් වත් ගැසීම නීතියට අනුකුල නොවේ.
එහෙත් පසුගිය තෙමස තුල පොලිසියේ නිලධාරින්, ආරක්ෂක හමුදාවේ නිලධාරීන් සහ රාජ්‍ය පාක්ෂික මැරයින් විසින් අහිංසක කිසිඳු අවියක් නොදැරූ ජනතාවට පහර දී ඇති බව අප සමාජ මාධ්‍ය ජාලා හරහා දුටුවෙමු.
දැන් මෙයට හේතුව කුමක්දැයි අප විමසා බැලිය යුතුය. රටේ පාලන තන්ත්‍රය, රාජ්‍ය ත්‍රස්තවාදීන්ගෙන් පෝෂිත වූ කණ්ඩායමකි. ආරක්ෂක හමුදාවේ සහ පොලිසියේ මෙහෙයුම් කටයුතු කරන්නේ ද පවතින ආණ්ඩුවේ හෙන්චයියන්ය. මේ හෙන්චය්යියන් ඇතුළු මැති ඇමති වරුන් සියල්ල යැපෙන්නේ කාගේ මුදලින්ද යන වග අප හොඳින් සිහිපත් කලයුතු කාරණයකි. දිනෙන් දින මිල ඉහල යන විදුලිය, ජලය, ගෑස්, ඉන්ධන ඇතුළු අප එදිනෙදා භාවිතා කරන සෑම භාණ්ඩයකින්ම රජය අය කරගන්නා ලබන බද්ද මේ රාජ්‍ය සේවකයින්ගේ වැටුප් ලෙස අප සියලුදෙනාම අඩු වැඩි වශයෙන් ගෙවන්නෝය. බොහෝ විට ආරක්ෂක භටයින්ගෙන්, පොලිසියෙන් සහ රාජ්‍ය ත්‍රස්තයින්ගෙන් පහර කෑ පුද්ගලයින් අඩු වැඩි තරමින් මේ පහර දුන් පුද්ගලයාගේ වැටුපට දායක වී ඇතිබව අප මතක තබා ගත යුතුව ඇත.
එසේ නම් අප අපගේ මුදලින් මෙවන් දාමරිකයින් නඩත්තු කල යුතුද? රජය මොවුනට විරුද්ධව නිසි ක්‍රියා මාර්ග ගනු ලබත් ද? රජයට එය සිහිපත් කර දීමට ඒ සඳහා විසඳුමක් ලබා දීමට විරුද්ධ පක්ෂය සමත් වුවාද? එසේ නොමැති නම් අප කල යුත්තේ කුමක් ද?
පාර්ලිමේන්තුවේ 225න් කීයෙන් කීදෙනෙක් පොදු ජනතාව ගේ ගැටළු නිරාකරණය කළෝද?
විධායක ජනාධිපති වරයා මේ සඳහා ගත් පිළියම් මොනවාද? මේවාට උත්තර නැත. කිසිවෙකුට උත්තර දිය නොහැකිය. දේශපාලන පිළිතුරු ප්‍රමාණවත් නොවේ. කොමිසන් පත්කිරීම අතීසාරයට අමුඩ ගැසුවා වැනිය.
කල හැකි කිසිවක් නොමැති ජනතාව අද සාමකාමී අරගලයට අවතීර්ණ වී ඇත.
ගෝටා ගෝ හෝම් කියන්නේ, මේ ජනාධිපති ක්‍රමය වෙනස් කිරීමට පටන් ගත යුතු තැනය.
225ම එපා කියන්නේ කිසිවෙක් පොදු ජනතාවගේ අයිතීන් සුරක්ෂිත කිරීමට අසමත් වූ නිසාය.
ක්‍රමය පෙරලමු කියන්නේ පොඩි එකාගේ සිට ලොකු එකා දක්වාත් ලොකු එකාගේ සිට පොඩි එකා දක්වාත් සියලු නිල තල හොබවන රාජ්‍ය තන්ත්‍රය වෙනස් කිරීමටය.
එසේ නම් විසඳුම සොයා ගත යුතුව ඇත්තේ අරගලයෙන් මිස වෙන කිසිම අයුරකින් නොවෙන බව අප සියලු දෙනාම අවභෝධ කර ගත යුතුව ඇත.