ජනතාවගේ බලය පෙන්වා ශ්‍රී ලංකා ඉතිහාසයේ ඊයේ ඇරඹුනු යුගය, ඉතිහාසයේ රන් අකුරින් සනිටුහන් විය යුතුය!
දවස මුළුල්ලේ නොයෙක් දුක් විඳිමින් කෑගසමින් දෙපයින්, පාපැදියෙන්, පෞද්ගලික වාහනයෙන්, බසයෙන් හෝ දුම්රියෙන් අරගල බිමට පැමිණි සියලූම ශ්‍රී ලාංකික ප්‍රජාවට අපගේ කෘතහස්ත ප්‍රණාමය පුද කරමු.
ඊයේ අරගල භූමියට පැමිණි ඔබ, එහි නොසිටින්නට ශ්‍රී ලංකාවේ අනාගතය හාත්පසින්ම වෙනස් වන්නට ඉඩකඩ තිබුණි. එහෙයින් ඒ ජයග්‍රහණයේ සුවය සහ සතුට ඔබ සැමරිය යුතුමය, ඒ ගැන කිසිවෙකුට තර්ක කල නොහැකි වෙනු ඇත.
දවස් 100යකට ආසන්න කාලයක් දහසක් කම්කටොලු විඳිමින් අරගල භුමියට ස්ඵන්දනය ලබා දුන් අරගලයේ නියමුවන් හට ඊයේ අරගලයට පැමිණි නොපැමිණි අප සියලු දෙනාම ණයගැති වෙමු, අනාගතයේ දිනෙක මේ උත්කෘෂ්ටවත් අවස්ථාව සමරන විටෙක ඔවුන් අපගේ ජාතික වීරයින් වෙනු නොඅනුමානය..
දැන්, මොහොතකට නැවතී ආපසු හරි බැලුවහොත්, ඊයේ සිදුවීම් සමූහය විමසා බැලුව හොත්, අප අපගේ බලාපොරොත්තු කීයක් 9 වෙනිදා අරගලයෙන් ඉෂ්ට සිද්ධ කර ගත්තෝ ද?
ප්‍රධාන ඉල්ලීම අතර පළමු ඉල්ලීම් තුන පමණක් සලකා බැලුව හොත්,
- ගෝඨාභය රාජපක්ෂ ඉල්ලා අස්විය යුතුයි.
- රනිල් වික්‍රමසිංහ ප්‍රමුඛ රාජපක්ෂ රෙජිමය රෙජිමය බලය අත්හළ යුතුයි.(අමාත්‍ය ධූර/ අමාත්‍ය මණ්ඩලය, අමාත්‍යාංශ ලේකම්වරු,අධ්‍යක්ෂකවරැ, උපදේශකවරැ, රාජ්‍ය ආයතන සහ සංස්ථා සභාපති වරු, තානාපතිවරු ඇතුලු පිරිස.)
- ගෝඨා රනිල් ආණ්ඩුව ඉවත් වීමෙන් පසුව ජනතා අරගලයේ ආර්ථික, සමාජයීය, දේශපාලන අරමුණු සහ අභිප්‍රායන්ට අනුකූල අන්තර්කාලීන පාලනයක් බිහිවිය යුතුය.
ජනතා අරගලයේ නියෝජිතයන්ට එම අන්තර්කාලීන පාලනයට නෛතික බැඳීමක් හරහා බලපෑම් සහගත මැදිහත්වීමක් කළ හැකි මහජන කවුන්සිලයක් ස්ථාපිත කළ යුතුය.
අප ඉහත කී කිසිවක් මෙතෙක් දිනාගෙන නොමැත.
රනිල්, තමන් ඉවත්වන්නේ අන්තර් කාලීන පාලන ක්‍රමයක් ස්ථාපිත වීමෙන් අනතුරුව බව ප්‍රකාශ කරයි. ගෝටා 13 වෙනිදා ඉවත්වීමට බලා පොරොත්තු වෙන බව ප්‍රකාශ කරයි.
එසේනම් වසර 74ක් තිස්සේ අප රැවටු මේ හොර නඩය, නැවත වතාවක් එවන් රැවටීමකට මුල පුරනවා දැයි සැක සහිතව ඉතා අවධානයෙන් සහ විමසිල්ලෙන් සිටිය යුතුය.
තවමත්, පක්ෂ නායක රැස්වීම් කැඳවන්නේ අස්වීමට බල කල රනිල් ය, ජනාධිපති ලෙස වැඩ භාර ගැනීමට ලක ලෑස්ති වන්නේ හොරු රැල විසින්ම පත්කළ කතා නායකයාය. එසේ නම් ඊයේ ජයග්‍රහණය රන් අකුරින් ලියවීමට තරම් “අකුරු” දිනා ගත යුතුය.
අරගලය නිමා වී නොමැත, එහි දුෂ්කරම කාලය දැන් උදා වී ඇති බව අප සිහියේ තබා ගත යුතුය.
මේ ලිපිය කියවූ ඔබ හට ඊයේ ලැබූ අත්දැකීම අනාගතයේ මෙවැනිම වූ දිනයන්ට පෙරහුරුවක් වූවා වන්නටත් පුළුවන.
Add comment