අයිස් මත් ද්‍රව්‍ය ජාවාරම් කිරීම, සන්තකයේ තබා ගැනීම සම්බන්ධයෙන් වරදකරුවන් වන පුද්ගලයින්ට එරෙහිව අධිකරණය මගින් “මරණීය දණ්ඩනය” නියම කිරීම පසුගිය 24 වෙනිදා සිට බල පැවැත්වෙන පරිදි “විෂ වර්ග, අබිං අන්තරාදායක ආඥාපනත” සංශෝධනය කිරීමෙන් බලාත්මක විය.
මේ පිලිබඳ ඉතා සියුම් ව සිතා බැලුව හොත්, මෙම විෂ සහිත මත්ද්‍රවය මහා පරිමාණයෙන් මෙරටට ගෙන ඒමේ නිරතව සිටිනා පුද්ගලයින් අත් අඩංගුවට ගැනීමට මෙතෙක් පැවති කිසිඳු රජයක් සමත්වී නොමැත. මත්ද්‍රවය ජාරාවම්කරුවන්ගේ අතිජාත මිත්‍රයින් ජනබලයෙන් හෝ අනෙක් විවිධ මාර්ග වලින් පාර්ලිමේන්තුවට පැමිණ තිබීම මෙයට මුලිකවූ කරුණු වෙන බව නොදන්නේ බහතෝරන දරුවන් පමණි. එහෙව් පරිසරයක් යටතේ, රජය කර ඇත්තේ තම මිත්‍ර සගයින්ගේ ව්‍යාපාර අඩපන කිරීමට නීති පැනවීමකි. එයද හිස මුදුණින් පිළිගන්නා මොලය හිසතුල පිහිටා ඇති කිසිඳු සත්වයෙක් ශ්‍රී ලංකාව තුල නොවේ. එමෙන්ම, තැනෙක රජයේ මන්ත්‍රී වරියක් කංසා වැවීමට පිඹුරුපත් සකස් කරනා අතර ඇගේ තනපටේ එල්ලී සිටින ජනපති මෙම නීතිය බලාත්මක කිරීමට කැමැත්ත පලකලේ ඇයි දැයි යන්න මොලේ පොට යන තරමට කල්පනා කලයුතු ගැටලුවකි. එසේ නම් මෙම නීතිය හදිසියේ පන ගැන්වූයේ ඇයිදැයි අප බුද්ධිමත්ව විමසා බැලිය යුතුය.
අරගලය සමයේ කංසා පැලයක් අරගල භූමියට ගෙන ආවේ කවුරුන්ද? කංසා පැලයක් ගෙන ඒමට හේතුව කුමක්ද? අරගල කරුවන් කංසා වැවුයේ යයි රටපුරා ප්‍රචලිත කලේ කවුරුන්ද? මේසියල්ල සිහිබුද්ධියෙන් විමසිය යුතුය.
අවසානයේ මෙකී කංසා පැලයද අරගලයේ සහෝදරත්වය තුල මිය ගියේය. ඒපිලිබඳ කතිකාව වෙනත් දිනකට තබමු.
දැන් අපි නැවතත් මේ අයිස් කතාවට, එසේත් නැතිනම් විෂ මත්ද්‍රවය ලඟතබා ගතහොත් ලැබෙන දඬුවම “මරණීය” කිරීම පිටුපස ඇති සැලැස්ම ගැන සිතා බැලුව හොත්, මෙම කංසා සංදර්ශනයේ පසුබිම පහසුවෙන්ම තෝරා බේරා ගත හැක.
නව වැනිදා වූ අයිතිහාසික අරගලයෙන් පසු ගෙවීගිය කාල පරිච්චේදය තුල, පාසල් සිසුන්, විශ්ව විද්‍යාල සිසුන් මත්ද්‍රවය වලට ඇබ්බැහි වී ඇති කතාන්තර බොහොමක් ද අපට අසන්නට ලැබුණි. දැන් මේ මරණිය දණ්ඩනය සර්ව සාධාරණිය ලෙස, ශිෂ්‍යයින්ට හෙවත් තාරුණ්‍යයට උරුම කරවීමට අවශ්‍ය බලපත්‍රය රජය සන්තකයේ ඇත. බොහෝ විට පුනරුත්තාපනය කලයුතු යැයි ලොකු පුතා කී කණ්ඩායම, අන්තර් විශ්ව විද්‍යාලීය ශිෂ්‍ය බලමණ්ඩලය සහ අරගලයේ තරුණයින්ට මරණිය දණ්ඩනය හිමිකර දීමට මෙය බලාත්මක කර ඇතැයි අප තදින්ම විශ්වාස කරමු.
අරගල භූමියට කංසා ආ අයුරින්ම, අරගල කරුවන්ගේ, අන්තරේ සාමාජිකයින්ගේ හා අනෙකුත් තරුණයින්ගේ ගමන්මලු වලට හා සාක්කු වලට ඉබේම අයිස් වැටීමටද බොහෝ ඉඩකඩ ඇති බව අප අවබෝධ කරගත යුතුය. අරගලයේ නියුතු වන සහ එහි නොඑළඹෙන සෑම මොහොතකම ඉතා සිහි කල්පනාවෙන් සිටීම ඉතා වැදගත් බව අරගලයට සම්බන්ධ අප සියල්ලෝම හොඳින් මතක තබා ගත යුතුය. එසේ නොවුවහොත් වටිනා ජීවිත ගණනාවක්ම නිකරුනේ මේ සොරුන්ගේ නීතියට අනුව අපටත් රටටත් නැතිවී යනු නොඅනුමානය.
Add comment