අන්ධයින් සූරාකන බාලයින්

මාස කිහිපයකට පෙර පෞද්ගලික කටයුත්තක් සඳහා සඳහා ශ්‍රී ලංකාවට පැමිණි මා, මාගේ මිතුරියක් (ගීතා ලෙස නම් කරමි) විසින් ජෙරමි ප්‍රනාන්දු ගේ Miracle Dome (ආශ්චර්‍ය ගෝලය) වෙත මාද කැඳවාගෙන ගියේ මොන අරමුණකින් ද යන්න වග මට අදටත් පවතින ගැටලුවකි.
මගේ දෑසින්ම දැක අත්විඳි යමක් ලියා තැබීම වැදගත් යයි සිතු හෙයින් සකල ජනතාවගේ යහපත පිලිබඳ මෙයා ලියා දන්වන්නට තීරණය කලෙමි.
වසර 35කට ආසන්න කාලයක් ශ්‍රී ලංකාවෙන් බැහැරව සිටි උපතින්ම බෞද්ධයෙකු වූ මා, බුදුන් දෙසු දහමින් පිට වෙනත් නිකායන් පිලිබඳ බොහෝ පොතපත කියවා තිබුනද ජෙරමි වැන්නෙක් ගැනවත්, ඔහුගේ ක්‍රියා කලාප පිළිබඳවත් මින් පෙර කිසි දිනෙක අසා නොතිබුණි.
ඉතා විශාල ධනස්කන්ධයක් යට කර තනා තිබූ මෙම ගෝලය ඉතා ඉහල තත්වයකින් නිමවා තිබු අතර දහස් ගණනින් රැස්වූ අනුගාමිකයින් ගිනි අව්වේ දැවෙමින් දෙවියන් යදින්නට ඇති පෝලිමේ පොර කෑ අතර, එතෙරින් පැමිණි අය උදෙසා තිබු විශේෂ දොරටුවෙන් ඉතා පහසුවෙන් ඇතුළු වී මෙය නැරඹීමට ඉදිරිපෙළ ආසනයක හිඳ ගැනීමටද මට අවස්ථාව උදා විනි.
ගෝලය තුල තිබු විශාල ඩිජිටල් තිර මත නොනවත්වා දරෂනය වෙන ජෙරමි ගේ අතීත හාස්කම් දෙස බලමින් ඔහුගේ , ඔහු අලෙවිකරණ ක්‍රියාවලිය දෙස බලා සිටියේ උඩ බලා සිටිනවාට වඩා වෙන විකල්පයක් මා හට නොතිබූ හෙයිනි. ඔහුගේ දියණිය විසින් ආරම්භ කරන ලද තරුණ කණ්ඩායම් වල ක්‍රියා කලාපද, ඔහුගේ භාර්යාවගේ ක්‍රියා සහ ජෙරමි ගේ මැජික් හැර වෙන ගතයුතු දෙයක් මේ තිර මත ප්‍රදර්ශනය නොවීම දිවැස් ලත් ඔහුගේ හාස්කමක් ද විය හැකි යැයි මට සිතිනි.

පැය කිහිපයකට පසු ජෙරමි (මාගේ මිතුරිය, ගීතාට අනුව දිවැසියානෝ) වේදිකාව මතට සම්ප්‍රාප්ත විය. වර්‍ණ දෙකකින් සමන්විත කබායක් පැළඳ සිටි ඔහු මානසික රෝගියෙක් වියහැකි යැයි ඔහු දකිනා ඕනෑම කෙනෙකුට සිතිය හැකිය. ඔහු අත තිබු මයික්රෆෝනය දෙවියන් විසින් ඔහුට ලබාදුන් බවත් එය දියමන්තියෙන් සරසා ඇතිබවත් ඔහු සඳහන් කළේය.

තත්වය බැරෑරුම් වුයේ ඉන් පසුවය. මේ ගෝලය තුල රැස්ව සිටි 5000 කට ආසන්න ජනතාවගෙන් කිහිප දෙනෙකුට හැර අනෙකුත් සියල්ලන් ම ඉංග්‍රීසි භාෂාව තේරුම් ගැනීමට පවා ඉංග්‍රීසි අක්ෂර දැක තිබේදැයි සැකසහිත වූ පරිසරයක ජෙරමි කතා කරනුයේ ඉංග්‍රීසියෙන් සහ තවත් මොකද්දෝ භාෂාවකින් පමණක් වීමය. සමහරවිට අනෙකුත් භාෂාව අප නොදන්නා දිව්‍ය මය භාෂාවක් වියහැකි හෙයින් මාද ඒ පිලිබඳ කනස්සලට පත් නොවී සිටීමට වගබලා ගතිමි.

ප්‍රහසනය වූයේ ජෙරමි පසුපස ඔහුගේ වලිගය මෙන් මයික්රෆෝනයක් රැගෙන ගමන් ගන්නා පුද්ගලයාය. ජෙරමි ඉංග්‍රීසියෙන් කියවනා වචන සිංහලයට පරිවර්තනය කර ප්‍රකාශ කිරීම ඔහුගේ කාරය්ය වූ නමුදු, බොහෝ දේ හරියාකාරව පරිවර්තනය කිරීමට ඔහු අසමත්වීම විශාල ගැටළුවක් විය. විටෙක ජෙරමි තම කතාව නවතා ඔහු පෙර කියූ වචන ජෙරමි විසින්ම සිංහලයට හරවා කීම හාස්‍ය ජනක වේදිකා නාට්‍යයක් නැරඹීමක් වැනි වූ හෙයින් වට පිට බැලූ මා, එහි මා සමග සිනාසීමට වත් කෙනෙකු නොවීමෙන් අතරමන් වුයෙමි, සියල්ලෝම ජපකළ මන්තරයකට හසුවී එහා මෙහා වැනෙන අන්ධ භූතයින් වැනි විය.

කෙසේ වෙතත් තවත් පැයකට පමණ පසු ජෙරමි, දෙවියන්ගේ පණිවිඩය සහ ඔහුගේම සොයා ගැනීම් රැස්ව සිටි ජනතාව අතරට හඳුන්වා දිනි. ඔහු පවසන ආකාරයට, (ඉංගිසියෙන්) your faith, what you see, what you hear, what you smell, what you taste and what you touch අපට දැනීම සහ අවභෝදය ලබාදෙන අතර ඔහුගේ (එදින ප්‍රථම වතාවට එලි දැක්වූ) නව සොයා ගැනීම (7th sense) වුයේ what you think. රැස්ව සිටි 5000කට අධික සෙනග මහා හඬ දී ඔහුගේ මෙම සොයාගැනීම ට තම සතුට පලකල අතර මම, බුදුන් දෙසූ දෘෂ්ටි වික්ඥානය, ශෝත්‍ර වික්ඥානය, ඝාණ වික්ඥානය, ජ්ව්හා වික්ඥානය, කාය වික්ඥානය සහ මනෝ වික්ඥානය මෙයම නොවේදැයි සිහිපත් කලෙමි. බෞද්ධ නොවෙන මහා ජනතාවකට වෙනත් අයුරකින් බුදුන් දෙසූ දහමේ කොටස් ඔහුගේ (හෝ ඔහුගේ දෙවියාගේ) මෙන් ප්‍රකාශ කිරීම ම හාස්‍යයට කරුණක් වූ අතර අන්ධ මූඩ භක්තිකයින් රවටා මුදල් ගැරීම අතීතයේ සිටම පැවත එන හෙයින් මේ පිලිබඳ දුක්වීමෙන් පලක් නොවෙන බව මම අවබෝධ කර ගතිමි.
මහා ඔල්වර සන් හඬ මධ්‍යයේ, යම් දිනෙක ශ්‍රී ලංකාවේම ප්‍රධාන ආගම ජෙරමි ගේ ආගම කිරීම ඔහුගේ පරම පවිත්‍ර චේතනාව වෙන බවද ඔහු රැස්ව සිටි ජනතාවට ප්‍රකාශ කළේය. ඒ තරම ඔහුගේ සහායකයින් සංගීත වාදනයක් කල අතර තව පිරිසක් ලොකු අකුරින් “ඇවිත් බලන්න” ලියා තිබු බැනරයක් ඔසවාගෙන ශාලාව පුරා එහා මෙහා ගමන් කරන්නට විය. මෙයද, බුදුන් දෙසු වදනක් වූ “එහි ඵස්සිකෝ” හෙවත් “එව බලව” යන්න බව රැස්ව සිටි පිරිස නොදැන සිටිනවා විය හැකිය.
තවත් මෙකී නොකී බොහෝ දෑ සිදුවූ අතර, ගීතා ජෙරමි හමුවී ඔහුගේ ආශීර්වාද ලබා ගැනීමට යෑමට මටද සම්බන්ධ වෙනසේ ආරාධනා කලවිට, මා මේ කිසිවක් විශ්වාස නොකරන බව නැවතත් ඇයට සිහිපත් කර දෙමින් මා ද ඇය හා ආශීර්වාද පෝලිමට එකතු වූයෙමු. ගීතා මීට පෙර පිළිකා රෝගයකින්පෙලී ඉන් අනතුරුව යුරෝපා රටෙක වයිද්‍යයවරුන්ගෙන් නිසි ප්‍රතිකාර ගෙන සුවපත් වී සිටි අතර ඇයගේ පවුලේ පිළිකා රෝගයෙන් මියගිය සහ ඉන් පෙලෙන අයගේ චායා රුප සහිත A3 ප්‍රමාණයේ කඩදාසියක් මෙහි රැගෙන විත් තිබුණි. ඒ (ජෙරමි) දිවැසිවරයාගේ ආශීර්වාදය ලබාගැනීම සඳහාය.
මෙම චායාරුප අතර එම මොහොතේදී මහරගම පිළිකා රෝහලේ දැඩි සත්කාර ඒකකයේ ප්‍රතිකාර ලබමින් සිටි වයස මාස 5ක් වූ ගීතාගේ ඥාතී ළදරු පුතෙකුගේ රුපයක් ද විය. මාගේ මිතුරිය ජෙරමි, දිවසිවරයාට මේ පිලිබඳ විස්තර දැන්වූ විගස, ඔහු එම A3 පත්‍රය බිමහෙලන ලෙස ගීතාට දැන්වීය, ඒ වහාම ඇය එම පත්‍රය බිම හෙලු අතර ජෙරමි, ඒ පත්‍රය මත ඔහුගේ දකුණු පය තබා ගීතාට ආශීර්වාද කල අතර තව මාස තුනකින් මෙම දරුවාට නිට්ඨාවටම සුව පත් වෙන බවද, මේ පිළිකා රෝගය ඔවුන්ගේ පරම්පරාවෙන්ම මුලුමනිම ඉවත් කල බවද , මින් පසු ගීතාගේ පවුලේ කිසිවෙකුත් මේ පිළිකා රෝගයෙන් නොපෙළෙන බවටත් ප්‍රතික්ඥ දී, ළදරුවාගේ පියා ට දරුවා මත තැබීමට සුදු පැහැති රෙදි කැබැල්ලක් ද ගීතා අතට ලබා දුනි. නිශ්ශබ්දව මේ සියල්ල දෙස පසෙකට වී බලා සිටි මා අසලකටවත් නොපැමිණි, මාදෙස බැලූ ජෙරමි “I Like you” ඉංග්‍රීසියෙන් කියා ඉන් ඉවතට පියමන් කල සැනින්, පැය 6කට ආසන්න කාලයක් මෙම ගෝලය තුල සිට හෙම්බත්වූ මම මින් පිටවීමට කාලය හරි බව ගීතාට දැනුම් දුන්නෙමි. ඉන් අනතුරුව අප දෙදෙනාම ජෙරමි ගේ ගෝලයෙන් පිටත් වී දවසේ ඉතිරි කටයුතු සඳහා පිටත් වූයෙමු.

උදෑසන 10ට පමණ ගෝලයට ඇතුළු වූ අප, ජෙරමිගේ ගෝලයෙන් පිටවන විට පස්වරු 4 පසුවී විනාඩි 30 වී තිබුණි. වාහනයට නැගී අප කොළඹ බලා පිටත් වීම ආරම්භ කල අතර විනාඩි කීපයකට පසු මා මිතුරිය, ගීතා මට ඇයගේ ජංගම දුරකථනයට ලැබී තිබු පණිවිඩයක් පෙන්වීය. එය ඇයට ලැබී තිබුනේ දහවල් 12 පසුවී විනාඩි 30ක් ගතවූ පසුවය. එහි මෙසේ ලියා තිබුණි. ” Our son has died this morning, funeral will be held tomorrow 2pm at Maharagama hospital cemetery”. අපේ ආදරණීය පුතා අද උදෑසන මිය ගියා. දේහය පිළිබඳ අවසන් කටයුතු හෙට පස්වරු 2ට මහරගම රෝහල් සුසාන භූමියේදී සිදුකිරීමට නියමිතයි.